(2013 මැයි මස
24 වැනිදා) ජාතික පාපන්දු ක්රීඩකයින් තරග පාවාදීම්වල නිරතව සිටින බව ක්රීඩා
අමාත්ය මහින්දානන්ද අලුත්ගමගේ මහතා පවසනවා. පාපන්දු සංගමයේ ඊයේ පැවති මාධ්ය
හමුවකට එක්වෙමින් ඔහු මේ බව කියා සිටියා. එහිදී අදහස් දැක්වූ ක්රීඩා අමාත්යවරයා
කියා සිටියේ රුපියල් 15,000 ක් වැනි මුදලකට පවා තරග පාවාදීම්වල පාපන්දු ක්රීඩකයින්
නරතව ඇති බවයි. ඊට හේතුව ක්රීඩකයින්ට නිසි මුදලක් නොලැබීම බවත් ඔහු කියා සිටියා.
එහෙත් ඉදිරියේදී පාපන්දු ක්රීඩකයකුගේ මාසික ආදායම රුපියල් 80,000 ක් දක්වා වැඩි
කිරීමට බලාපොරොත්තු වන බවත් අමාත්යවරයා ප්රකාශ කළා. මේ වන විටත් කටාර් පාපන්දු
සංගමය ජාතික ක්රීඩකයකුට මසකට රුපියල් 50,000ක වැටුපක් ලබා දීමට එකග වී තිබෙනවා.
ඊට අමතරව රුපියල් 30,000 වැටුපක් සහිත රැකියාවක්ද ජාතික පාපන්දු ක්රීඩකයකුට
ඉදිරියේදී ලබා දෙන බවයි අමාත්යවරයා කියා සිටියේ.
මේ අතර පාපන්දු සංගමය දුප්පත් සංගමයක් නොවන බවත්
අමාත්යවරයා කියා සිටියා. මේ වන විට පාපන්දු සංගමයේ ස්ථිර තැන්පතුවල වටිනාකම
රුපියල් මිලියන 100 ක් පමණ වනවා. එම මුදල් පාපන්දු ක්රීඩාවේ දියුණුව සදහා යොදවන
ලෙසත් ජාතික සංගමය බැංකුවක් නොවිය යුතු බවත් අමාත්යවරයා එහිදී කියා සිටියා.
එම මාධ්ය
හමුවේදී පාපන්දු සංගමයේ සභාපති සහ ක්රීඩා ඇමති අතර ලකුණු සදහා ගැටුමක්ද ඇතිවුණා.
පළමුව පැයක කථාවක් පවත්වමින් ජාතික පාපන්දු සංගමයේ සභාපති රංජිත් රොද්රිගු මහතා
තමන් පත්වීමෙන් ගතවූ මාස 02 ක කාලය තුල විශාල වැඩ කටයුතු රැසක් සිදුකළ බව කියා
සිටියා. එහිදී ඔහු කියා සිටියේ පාපන්දු සංගමයේ සභාපතිට සහ ලේකම්ට බලතල ලබා දෙමින්
පරිපාලන කමිටුව විසුරුවා හැරි බවයි. එමෙන්ම ප්රධාන විධායක ඉවත්කළ බවත් ඔහු කියා
සිටියා. එමෙන්ම පසුගිය කාලයේ පාපන්දු අය වැය පිලිබදව පරීක්ෂණයක් ආරම්භකල බවත්
රංජිත් රොද්රිගු මහතා කියා සිටියා.
එහෙත් පසුව
කථාව පැවැත්වූ ක්රීඩා අමාත්යවරයා කියා සිටියේ එම කටයුතු සියල්ලම තමන් සිදුකළ
බවයි. පාපන්දු සංගමයට ඒවා සිදුකරන ලෙස කියා සිටියත් ඔවුන් එම කටයුතු දිනෙන් දින
පැහැර හැරි බවත් ඔහු පෙන්වා දුන්නා. මේ අනුව ක්රීඩා අමාත්යවරයාට පැවරී ඇති බලතල
භාවිතා කරමින් තමන් එම කටයුතු සිදුකිරීමට මැදිහත්වූ බවයි මහින්දානන්ද අලුත්ගමගේ
මහතා කියා සිටියේ. මේ අනුව රංජිත් රොද්රිගු මහතා පඹයෙක් බවත් රූකඩ නැටවූයේ තමන්
බවත් අමාත්යවරයා මාධ්ය හමුවේ ප්රකාශ කිරීම විශේෂත්වයක්.
